Семејствата на загинатите млади во пожарот во дискотеката „Пулс“ кој се случи лани во Кочани, остро реагираа по денешното барање на адвокатката Ивана Коцевска за олеснување на мерките куќен притвор за првообвинетиот Дејан Јованов – Деко, оценувајќи го како навреда за нивната болка и понижување на споменот на нивните деца.

Тие посочуваат дека секојдневно се соочуваат со загубата и празнината во домовите и наместо одговорност гледаат обиди за избегнување на последиците од трагедијата.

„Дали навистина сметаш дека твојата здравствена состојба е потешка од празнината што остана во нашите домови? Дали барем еднаш помисли на тие 63 животи кога го поднесуваше ова барање? Дали помисли на повеќе од 200 повредени, кои и денес се борат со последиците? Дали знаеш колку од нас, семејствата на починатите и преживеаните, сè уште живеат со трауми, болка, страв и неизвесност? Што им порачуваш на нашите семејства, на преживеаните, кои секој ден повторно и повторно ја преживуваат истата ноќ? Дали сметаш дека нашата болка е помала од твојата? Дали воопшто може и да ја споредиш? Што значи за тебе човечност, морал, совест и одговорност? Дали имаш храброст да застанеш пред родителите и семејствата на починатите млади лица и пред повредените, и да им погледнеш во очи? Ние не бараме пресуда на улица. Бараме правда во судница. И ќе ја бараме – сè додека не ја добиеме“, стои во објавата.

Првообвинетиот во случајот за пожарот во дискотеката „Пулс“ во Кочани, Дејан Јованов-Деко, денеска беше пренесен со Брза помош од судницата во „Идризово“ поради влошена здравствена состојба.

Според информациите од судскиот процес, неговата одбрана посочила дека обвинетиот неодамна бил опериран на лумбалниот ’рбет, а по дополнителни компликации имал и втора хируршка интервенција.

Во пожарот загинаа 63 луѓе, а повредени беа околу 200. Пожарот изби на концертот на ДНК. Членовите на групата исто така настрадаа во пожарот.