Претседателот на СДСМ, Зоран Заев, пред почетокот на седницата на Советот за безбедност, цени дека од денеска треба да биде продолжена вонредната состојба во државата и дека техничката Влада се однесувала до сега одговорно иако се поминати 100 предизборни дена од претходно предвидените.

„За да продолжи ефикасното справување со кризата, потребна е одлука за вонредна состојба. Во ситуација кога Собранието е распуштено, Владата, преку механизмите што ги има на располагање и преку уредби со законска сила ќе може навремено и темелно да реагира, како досега.
Ценам дека Владата покажа одговорно однесување во вонредната состојба носејќи мерки и уредби исклучиво во интерес на граѓаните и справување со состојбите. Токму вонредната состојба даде можност за спроведување на брзи и ефикасни мерки во насока на спречување на ширење на коронавирусот, заштита на здравјето и справување со економските последици.
Да не заборавиме - ова е борба за највредното, човечкиот живот. Справувањето со коронавирусот бара сериозна посветеност од институциите, но и од нас како поединци. Да продолжиме целосно да ги почитуваме мерките и задолженијата од надлежните институции и на тој начин секој од нас да придонесе за побрзо надминување на заканата што ја носи коронавирусот“, објави Заев.

Инаку кај претседателот Стево Пендаровски во тек е шестата седница на Советот за безбедност посветена на справување со пандемијата на Кови-19 во нашата земја на која треба да биде одлучено за продолжување на вонредната состојба.

На истата не присуствуваат, иако беше најавено, техничкиот премиер Оливер Спасовски, вицепремиерот за евроинтеграции Бујар Османи и министерот за здравство Венко Филипче. Првите двајца вчера беа во контакт со кумановскиот градоначалник Максим Димитриевски, кој пак денеска објави дека е заболен од корона вирусот.