Започна легислативната процедура за ратификација на Протоколот за прием на Македонија како 30-та членка на НАТО во САД, најави министерот за надворешни работи Никола Димитров во Вашингтон каде што се одржува Самитот по повод 70-годишнината од Алијансата.

- Тоа што веќе администрацијата го пренесе предметот во Сенатот, и тоа за прилично брзо време, е голема работа. Увидов дека има волја и кај Републиканците и кај Демократите. Мислам дека нашиот план да станеме полноправна членка до НАТО-самитот во Лондон во декември е реален.

И Мајк Помпео, државниот секретар на САД, изрази задоволство што минатата седмица до американскиот Сенат е поднесен документот за ратификација на протоколот за членство на земјата во НАТО

За тоа дали е потребно лобирање за да се забрза ратификацијата и кај другите членки на НАТО кои што не го направиле тоа, Димитров вели дека брзањето ќе го поттикнува свеста кај другите дека долго време Македонија тропа на вратата на Алијансата.

- Добро ни оди динамиката и мислам дека планот ќе ни успее до декември - рече Димитров во Вашингтон.

За користа, но и обврските кон Алијансата, навести: „Реално е, а и` цврсто стоиме зад таа заложба да го достигнеме тој праг од 2% од ГДП за целосна партиципација во заедничкиот буџет на НАТО до 2024-та, најави првиот човек на дипломатијата на Северна Македонија за Гласот на Америка на македонски.