Синоќа во Куманово изгоре дуќан на членот на Советот на Општина Куманово, Фитор Јакупи. Од ДУИ оценуваат дека се работи за акт на омраза и меѓуетнички поделби и ја повикуваат меѓународната заедница да реагира. 

Тој на социјалните мрежи објави дека непознат сторител ја опожарил неговата канцеларија во 03.05 часот.

Запалени се и неколку автомобили, а ДУИ реагира дека пожарите се подметнати. Јакупи повика на брза реакција од надлежните органи.

Еден од изгорените автомобили е на јавен обвинител, потврди Основното јавно обвинителство. Неофицијално, синоќа е запалено возилото на јавниот обвинител Џелал Бајрами, кој претходно во Владата на Никола Груевски бил министер за труд и социјална политика и заменик-министер за внатрешни работи, како кадар на ДУИ.

- Преземени се сите дејствија и се испитуваат причините и евентуалните мотиви за опожарувањето. Прибрани се траги од лице место кои ќе бидат предмет на вештачење, а се врши увид и во снимки од камери за видео надзор, информираа денеска од Јавното обвинителство.

Кумановската пожарна синоќа интервенирала на две возила на улицата „Трст“ и едно возило на улицата „Никола Вапцаров“. Интервенирано е и на пожар на фотокопирница.