Д-р Жан Митрев и Клиничката болница „Жан Митрев“ информираат дека испратиле писма до амбасадите на САД, Франција, Германија, Велика Британија и на Холандија и до Делегацијата на ЕУ, со кои ги информираа за текот на истрагата во случајот против докторот и Клиниката. Со писмото се упатува повик за нивното внимание и поголем мониторинг на одвивање на целата истражна постапка и основаноста на обвинението, поради „досегашното површно иследување на постапката“.

„Ви се обраќам со намера да Ве информирам и запознам за случајот што верувам дека може да остави длабоки траги во општественото живеење, во перципирањето на здравствената професија и случај што претендира да воведе лоша пракса во правосудниот систем во државата. Ваквите примери можеби се ретки, но и како такви може да предизвикаат штета со далекусежни последици”, стои во писмото до амбасадите и европското претставништво.

Д-р Митрев, осврнувајќи се на работата на клиниката, со акцент на периодот од Ковид пандемијата за кога се однесува обвинението и кога Клиничката болница Жан Митрев го има највисокиот процент на успех во третманот на пациенти со Ковид-19, со 74,6 отсто излечени од сите случаи, додека пак смртноста е 25 отсто наспроти 51,5 отсто во другите болници, вели:

„И покрај овие резултати, и покрај пожртвуваната работа на целиот тим, денес Клиничката болница Жан Митрев и моето име и дело се предмет на истрага за која имаме основани сомневања дека се спроведува површно, без да се навлезе во суштината“, се вели во писмото и се предупредува дека „сведоштва за несериозноста и за нецелосно иследување пристигнуваат од сите оние што се повикани како сведоци и кои можат најавтентично да посведочат како се боревме за животот и колку животи спасивме“.

Основното јавно обвинителство Скопје во август отвори истрага за измама на пациенти во приватната клиника „Жан Митрев“, а сопственикот на приватната клиника беше повикан на распит во врска со лекувањето на пациентите со методот на хемофилтрација.