Заменик-министерката за транспорт Калтрина Зеколи Шаќири денес на прес-конференција побара правда за сообраќајната несреќа на скопската обиколница кај Радишани, каде што нејзиниот сопруг, велосипедистот Арбер Шаќири, пред три години беше прегазен и го загуби животот.

Зеколи-Шаќири вели дека ѝ е одбиено правото на жалба, откако судот претходно му изрече 7 месеци затворска казна на лицето осомничено за предизвикување на несреќата.

„И во најтешкиот момент, кога беше објавена пресудата, а болката повторно ме совлада, судијката Драгана Исаковска го крена гласот. Го крена гласот кон жена која изгуби сè, само затоа што реагирав човечки. Во тој момент не зборував како професионалец, туку како мајка и скршена сопруга. Излегов со реченица што доаѓаше од мојата душа. Се надевам дека никогаш нема да доживеете таква болка. Денес сум пред вас со врзани раце, законот не ми дава право на жалба, но Обвинителството ми дава и денес јавно се обраќам. Барам жалба на пресудата, барам фер пресуда“, нагласи Зеколи Шаќири.