Министерството за здравство подготви повеќе важни измени и дополнувања на Законот за здравствената заштита, кои неделава се поставени на Единствениот национален електронски регистар на прописи ЕНЕР. Сите засегнати страни имаат можност да достават свои сугестии и предлози, кои ќе бидат разгледани согласно утврдената процедура.

Една од промените што досега не беше најавена е тоа дека лекарите специјалисти,онаму каде што се дефицитарни, наместо до 67,ќе можат да работат до 70 години, а при тоа истовремено тековно ќе ја примаат својата пензија. Ова денес го најави самиот министер за здравство Азир Алиу.

- Исто така, се зголемува и возраста за ангажирање искусни кадри доктори на медицина од дефицитарни специјалности/супспецијалности и искористување на нивната стекната стручност. За овие лица се овозможува од 67 години до навршување 70 години возраст со договор да бидат ангажирани во здравствени установи во мрежата и да ја задржат пензијата. Ангажирањето ќе биде врз основа на согласност од Министерството за здравство и Фондот за здравственото осигурување, доколку нема повеќе услови за извршување на определена здравствена дејност или за извршување на непрекината дејност, рече министерот Алиу.