Премиерот Зоран Заев денеска изјави дека решение за спорот што Грција го има со нашето уставно име може да се најде ако се води сметка за достоинството и за идентитетот. 

Заев очекува Македонија и Грција до летото да дојдат до решение за кое се надева дека ќе биде прифатено од јавноста и од институциите на двете земји. По состаноците со странските гости, Заев најавува нова домашна лидерска средба.

„Луѓето што преговараат се само поединци, а на крајот институциите на Македонија и на Грција се тие коишто одлучуваат. Верувам дека може да се направи исчекор, можеби не до крај да се реши, но секако да се приближиме зашто деновите и месеците се трошат, а ние сакаме до летото да го имаме решено овој проблем. Верувам дека тоа сака да го направи и грчката страна“- рече Заев.

Кај премиерот има оптимизам за решение за името. 

Грчкиот министер за надворешни работи, Никос Коѕијас во Скопје доаѓа оваа недела, а Заев најави и средба со медијаторот Метју Нимиц наредната недела.

Горна Македонија, но и Нова Македонија напишани на словенски јазик се во игра од петте предлози во пакетот на Атина, пишуваа деновиве грчките медиуми.