Поранешниот македонски премиер Зоран Заев во интервјуто за грчката телевизија One Channel, што се емитуваше синоќа на полноќ, изјави дека следен чекор од Преспанскиот договор е комплетната промена на личните документи на граѓаните со новото уставно име, но и дека Грција и натаму има недовршени обврски.

- Оваа година или на почетокот од следната година граѓаните на Северна Македонија ќе го комплетираат процесот на промена на личните документи со новото име на земјата. Мојата лично е променета со новото уставно име уште пред три години, многу луѓе во меѓувреме си ги обновуваат документите, а крајниот рок е февруари 2024, рече Заев.

Поранешниот премиер рече дека крајниот рок за Грција да ги промени имињата на патоказите е пет години по потпишувањето на Преспанскиот договор.

- Овие патокази водат кон непостоечка земја, бидејќи повеќе не постои таква држава со име ФИРОМ, открива Заев.

 Тој напомена дека Грција се уште не го формирала договорениот Второстепениот Совет и дека меморандумите за соработка со Грција се уште не се донесени во грчкиот парламент.

Заев во интервјуто нагласи дека неговите две деца студираат во Солун, бидејќи тоа е на само 100 километри од неговиот роден град Струмица кадешто сега живее и работи. Додаде дека има бизнис релации со Грција и дека го проширува бизнисот на неговите компании во оваа земја.