Екс премиерот Зоран Заев вели дека претседателот на ВМРО-ДПМНЕ, Христијан Мицкоски и претседателката на државата, Гордана Силјановска Давкова треба да го почитуваат Уставот, Преспанскиот договор и законите. 

Рече дека претседателот на Северна Македонија, пратениците, премиерот на Владата, министрите и сите носители на функции се должни и мора да бидат пример за почитување на Уставот, меѓународните договори и законите.

„Непочитувањето носи одговорност, но и сериозни последици за државата кои веднаш ќе ги почувствуваат граѓаните. Одговорноста не е само политичка, туку и правна. А последиците се децениско непријателство со соседните земји, со Европската унија, со САД и ОН. Сето ова ќе има далекусежни последици за секојдневниот живот и севкупниот стандард на Македонците и другите етнички заедници во Северна Македонија. Апелирам до нив да се тргнат од партиската наметка и што поскоро да сфатат дека сега сносат одговорност за државата и граѓаните. Владата ги почитува Уставот, меѓународните договори и закони како пример за целиот народ и тоа целосно ги почитува, или како влада презема чекори за нивно поништување или менување. Впрочем, Мицкоски и претседателката Силјановска Давкова многупати повторија дека немаат намера да го поништат Договорот од Преспа, иако не се согласуваат со него. Затоа како носители на највисоките државни функции треба да го почитуваат Уставот, меѓународниот преспански договор и законите. Тие треба да гледаат напред кон иднината на Северна Македонија и македонскиот народ“, вели Заев.

Инаку, од Грција веќе имаше опомена дека Договорот од Преспа мора да се почитува. Ветото пак може да биде опција. Од ЕУ и САД исто укажаа на почитување на договорот. 

На инаугурацијата, Силјановска Давкова наместо Северна Македонија, кажа само Македонија што предизвика реакции. 

На 17 јуни 2018 година во Нивици, тогашните премиери Зоран Заев и Алексис Ципрас како и шефовите на дипломатиите, Никола Димитров и Никос Коѕијас го потпишаа Договорот од Преспа со што се затвори спорот за името кој траеше со години.