На својот Фејсбук-профил попладнево премиерот Зоран Заев објави дека случајот „Рекет” го пријавил на 22 април 2019 година.

„Денес добив прашање од медиумите за точниот датум кога сум го пријавил случајот „Рекет”. Проверив и ја известувам јавноста дека случајот „Рекет” го пријавив на 22 април 2019 година“, напиша Заев. 

Премиерот денеска  кажа дека одржал состанок десетина дена пред Орце Камчев да ги однесе документите и материјалите во Обвинителството за организиран криминал и корупција и дека на средбата присуствувале државниот обвинител и обвинителката за гонење организиран криминал.

Заев рече дека точниот датум на состанокот ќе го провери во својата агенда и ќе го соопшти до крајот на денот.

За овој случај бизнисменот Зоран Милевски Кичеец доби 3 години затвор, а им се суди и на екс специјалната јавна обвинителка, Катица Јанева и шоуменот Бојан Јовановски.