Францускиот премиер Едуар Филип се сретна со шефот на македонската Влада, Зоран Заев, на билатерална средба во рамки на Самитот ЕУ - Западен Балкан во Познањ, Полска, и му даде поддршка за продолжување на зацртаните реформи за владеењето на правото.

Како што соопшти прес-слуќбата на Владата, нагласен бил и заедничкиот интерес што го делат Франција и Северна Македонија да работат на продлабочување на билатералните односи и на економската соработка и упати честитки за Договорот од Преспа и за имплементирањето на придобивките од новата добрососедска реалност.

На средбата присуствуваа и заменик – премиерот задолжен за европски прашања Бујар Османи и министерот за надворешни работи Никола Димитров, а Заев нагласил дека се остварени сите неопходни очекувања од земјата испорачани на минатогодишниот состанок на Европскиот Совет, вклучувајќи ги и уставните промени за името на земјата, и дека за испорачаното земјата очекува и исполнување на ветувањето на Европскиот Совет за почеток на преговорите во октомври.

– Таквата одлука ќе биде јасна порака и за другите во регионот дека вреди да се вложува во реформите и во унапредувањето на билатералните односи во регионот, како и во регионалната соработка. Ја поддржуваме дебатата за реформи во ЕУ, но убедени сме дека тој процес може да оди паралелно со процесот на преговори и за проширување со земјите од регионот, рекол премиерот.