По прозивките од пратеникот Иван Стоиљковиќ од Демократската партија на Србите во Македонија, за тоа дали и Македонија е дел од „пакт“, против Србија како што изјави косовскиот вицепремиер, Енвер Хоџај, премиерот Зоран Заев на денешната прес-конференција одговори дека тој се оградува од било какви разговори, бидејќи тие не постоеле.

„Сакам да се оградам од било какви разговори, не постоеле, ниту пак некој ги номинарал и само апелирам и до Косово и до Србија да градат пријателство низ дијалог“, изјави Заев.

Тој рече дека на ниту едно ниво никогаш не се водени такви разговори.

„Како Влада во регионот, Европа и во светот важиме како градители на добрососедските односи. Ние сме пријатели со сите наши соседи. Никој од нас не побарал ниту пак е разговарано за ова прашање“, вели Заев. 

Очекуваме, вели Заев нашиот регион да ги постигне четирите цели за кои се залагаме секогаш кога ќе се сретнеме со премиерите на нашите соседи, а тоа е економска соработка, регионален економски развој, регионална соработка и интеграција во ЕУ. 

Стоиљковиќ претходно праша дали Заев ги брани интересите на Македонија, или албанскиот шовинизам. 

Во Македонија, Хрватска и Црна Гора се разговара за формирање пакт против Србија, изјави Хоџај. 

Србија ништо лошо им нема направено на Македонија, Црна Гора и Босна, рече српскиот вицепремиер и министер за внатрешни работи Небојша Стефановиќ. Тој реагираше синоќа по повод изјавата на косовскиот вицепремиер Енвер Хоџај дека во Хрватска, Македонија и во Црна Гора разговарал за создавање на регионален пакт против Србија.