Дали е судбина во прашање или само случајно, две души се сретнале на исто место во исто време? Во Дубаи, градот што е спој на иднината и луксузот се запознале Македонката Стефана Нисиќ Ебходагхе и Лаурел, Нигериец кој живеел во Дубаи.

Во овој град започнала нивната љубовна приказна. Стефана сосема неочекувано го запознала сегашниот сопатник Лаурел со кого сега живеат во Македонија и го имаат прекрасното синче – Киан.

Семејството Ебходагхе во интервју за Женски Магазин зборуваше подетално за нивната љубовна приказна, предизвиците во нивната врска, соочувањето со различните култури, но ставивме акцент и на најголемиот христијански празник Велигден.

Тие ни раскажаа малку повеќе околу начинот на кој го прославуваат празникот, македонските адети кои ги почитуваат и дали и кои нигериски обичаи ги практикуваат за празникот во Македонија.

ЖМ: Како се запознавте?

-Се запознавме во Дубаи, во период кога најмалку очекував дека ќе се случи нешто толку значајно. Сè почна многу спонтано, но брзо сфативме дека имаме силна поврзаност. Понекогаш најубавите приказни навистина почнуваат кога најмалку се надеваш.

ЖМ: Колку време сте заедно?

-Заедно сме веќе неколку години, период во кој поминавме низ многу убави моменти, но и предизвици кои нè направија посилни. Нашата врска растеше постепено, со многу разбирање, трпение и поддршка еден кон друг.

Со текот на времето, не само што се запознавме подобро како партнери, туку изградивме и стабилно семејство, исполнето со љубов, почит и заеднички вредности.

ЖМ: Како одлучивте да живеете во Македонија? Зошто Македонија, а не Нигерија?

-Одлуката да живееме во Македонија дојде природно, како резултат на околностите и можностите во тој момент. Македонија ни понуди поголема стабилност, поблиска семејна поддршка и подобри услови за градење на секојдневен живот.

Иако Нигерија е дел од нашиот идентитет и секогаш ќе има посебно место за нас, во овој период од животот Македонија беше поедноставен и посигурен избор за нашето семејство.

ЖМ: Како вашиот сопруг се вклопи во македонската култура? Кои моменти му беа најтешки за адаптација? Што му беше најголем предизвик?

-Мојот сопруг доаѓа од поинаква култура, па нормално имаше период на адаптација. Најтежок му беше јазикот и административните процедури, кои знаат да бидат збунувачки за некој што доаѓа од страна. 

Исто така, требаше време да се навикне на помирниот начин на живот. Сепак, со време и поддршка, успешно се вклопи и денес Македонија ја чувствува како свој дом.

ЖМ: Како ги прославувате празниците во Македонија? Дали ги почитувате традициите и обичаите? 

-Празниците ги прославуваме во топла семејна атмосфера, со убав спој на македонската и нигериската култура. Се трудиме да ги почитуваме традициите од двете страни и да внесеме по нешто од секоја, за секој празник да има свој посебен дух.

За нас е многу важно и нашето дете да расте со двете култури, да ги запознае обичаите, јазикот, музиката и вредностите и од Македонија и од Нигерија. Веруваме дека на тој начин ќе израсне како личност што ги разбира и почитува и двете култури.

ЖМ: Дали се прославува Велигден во Нигерија? Какви се обичаите таму? Дали има некој обичај што е различен од нашите?

-Велигден се прославува во Нигерија, најмногу со црковни служби и семејни собири. По службите луѓето се собираат, јадат и слават во весела атмосфера со музика и танц.

Разликата со Македонија е што таму празникот е поразигран и музички, додека кај нас повеќе се задржани традиционални обичаи како бојадисување јајца и семејни посети.

Но и двете култури го споделуваат истото значење на Велигден, семејство, вера и заедништво, и се трудиме да ги пренесеме и двете традиции и на нашето дете.

ЖМ: Како изгледа вашата велигденска трпеза? Дали имате некој посебен специјалитет?

-Нашата велигденска трпеза е мешавина од македонска традиција и нигериска кујна, што ја прави навистина посебна. Секогаш има бојадисани јајца, домашна погача, печено месо и разни салати.

Како специјалитет би го издвоила егуси, традиционално нигериско јадење кое кај нас е омилено и секогаш се подготвува за посебни прилики. За нас, празникот е време кога двете култури се спојуваат на една маса, со многу љубов и семејна топлина.

ЖМ: Дали заедно вапсате јајца?

-Да, заедно вапсаме јајца. Тоа ни е мал, но многу убав семеен обичај кој ни го прави Велигден уште посебен, затоа што сите учествуваме и уживаме во подготовките.

ЖМ: Како изгледа едно ваше секојдневие?

-Нашето секојдневие е едноставно, но доста динамично. Денот најчесто ни започнува околу детето, потоа следуваат домашните и работните обврски, кои се трудиме добро да ги организираме.

Иако секој има свои задачи, секогаш наоѓаме време за заеднички моменти , било да е тоа оброк, кратка прошетка или вечерно опуштање дома. Тоа ни е најважно, да ја задржиме семејната блискост и во брзото секојдневие.

ЖМ: На кој јазик зборувате со вашето синче? Дали ги учи и двата јазици одеднаш?

-Со нашето синче комуницираме на три јазици, македонски, англиски и јазикот на мојот сопруг. Се трудиме секој јазик да биде природно вклучен во нашето секојдневие, без притисок и без строго раздвојување.Тој ги слуша сите три јазици од мал и ги учи паралелно, преку игра, песни и разговор. 

ЖМ: Дали планирате да продолжите да живеете во Македонија?

-Во моментов, Македонија е нашиот дом и местото каде што го градиме нашиот семеен живот. Тука чувствуваме стабилност и поврзаност, особено благодарение на блискоста со семејството и секојдневната поддршка. За иднината не поставуваме строги планови, остануваме отворени за околностите и одлуките што природно ќе се развиваат со текот на времето.

РЖМ/Јована Трајковска

Фото: приватна архива

*ЗАБРАНЕТО ПРЕЗЕМАЊЕ НА СОДРЖИНАТА*