Синдикатот на културата денеска одржа протестен совет пред Министерството за култура поради неисплатените плати и како што соопшти, обидите за непочитување на колективните договори. Собирот следуваше откако работниците од културата останаа без мартовската плата за велигденските празници.

- Повод за овој протестен Совет во проширен состав пред Министерството за култура и туризам е ударот врз достоинството на културните работници, ненавремените и јасни насоки за пресметка на плата од Министерството за култура, постојаните обиди за непочитување на колективните договори, што резултираше со доцнење на платите и оставање на вработените во културата за велигденските празници без пари, рекоа од Синдикатот.

„Ние културните, дојдовме кај некултурниот по плата !“,кусо искоментира на социјалните мрежи и Слободан Трендафилов, претседателот на Сојузот на синдикати на Македонија, алудирајќи на тоа дека вината е кај министерот.

Министерот за култура Зоран Љутков за време на празничниот викенд им се извини на вработените во ресорот и порача дека проблемот настанал поради усогласување на платите. Тој рече дека доцнењето е поради усогласувањето на платите меѓу сите засегнати без подетално образложение за што станува збор.