Во кривичниот суд во Скопје, треба да започне судењето за ексминистерката за внатрешни работи, Гордана Јанкулоска за набавката на екстралуксузниот „мерцедес“ во предметот „Тенк“ на Специјалното јавно обвинителство. Ова е издвоена постапка за Јанкулоска и судењето почнува од почеток откако поранешната прва полицајка во меѓувреме се пожали на потешкотии во состојбата со бременоста, а на почетокот на летото се породи со машко дете. Во меѓувреме стапи и судската ферија, односно летниот одмор поради што немаше рочишта во текот на летото.

СЈО предложи на Јанкулоска да ѝ се суди посебно, откако адвокатите претходно приложија медицинска документација за отворено лекарско боледување поради бременоста. За истиот предмет, експремиерот Никола Груевски доби казна затвор од 2 години, а второобвинетиот Ѓоко Поповски, доби 6,6 години затвор. Скопска Апелација утре ќе одлучува за жалбата на Груевски за овој предмет.

Јанкулоска е обвинета за злоупотреба на службената положба и овластување како поттикнувач. За ова кривично дело на поранешната министерка ѝ се заканува казна затвор од најмалку 5 години. Според обвинението, Јанкулоска за да го исполни барањето на Никола Груевски, со умисла го поттикнала обвинетиот Ѓоко Поповски да стори кривично дело

Судењето на Јанкулоска официјално започна на 28 мај.