Mинистерот за надворешни работи, Никола Димитров денеска изјави дека овој месец ќе има средба на ниво на преговарачките тимови и во оваа прва фаза нема да има посета на посредникот Метју Нимиц на регионот. 

Димитров нагласи дека многу е поважно што се прави, отколку што се најавува.

„Факт е дека процесот беше во застој подолго време, бидејќи освен спорот за името постојат и други пречки во процесот на евроинтеграциите. Сега постојат сериозни напори земјата да ги отстрани тие пречки. Со новата политичка состојба, постои политичка волја и оптимизам тие да се надминат“– рече Димитров.

Тој рече дека во Солун, за време на средбата на шефовите на дипломатии на Македонија, Грција, Албанија и на Бугарија, имал билатерална средба со министерот за надворешни работи на Грција, Никос Коѕиас, и дека договориле соработка на ниво на невладини организации, универзитети и на академици.

„Нашата политика е да им одземаме аргументи и причини на тие што би сакале блокадата на нашиот евроатлански пат да остане. Претходната надворешна политика даваше аргументи, а ние сме заинтересирани не само да не даваме аргументи, туку и да одземаме“– додаде Димитров.