Oд Амбасадата на САД во Скопје не сакаат да ја коментираат посетата на косовскиот премиер Албин Курти во Тетово и Чаир во петокот. 

„Настаните ги видовме како бескорисни и ве упатуваме на коментар во Амбасадата на САД во Приштина“, велат оттаму.

За време на посетата во Тетово се вееја знамиња на „Голема Албанија“, гест кој го вознемири регионот и поради што полицијата ги повика на разговор градоначалниците на Чаир и Тетово, Висар Ганиу и Билал Касами. Против нив се поднесени прекршочни пријави. 

Американскиот амбасадор во Косово, Џефри Ховениер,  рече дека САД не поддржуваат ниту „Голема Албанија“ ниту „Голема Србија“.

Вицепремиерот Артан Груби вели дека градоначалниците  продавале фолклоризам и провиден патриотизам на настаните каде не го истакнаа македонското знаме и не се интонираше македонската химна. Според Груби, Касами и Ганиу се обиделе да го злоупотребат косовскиот премиер Албин Курти. Вели дека тој театар кој се приредува е непотребен. 

Со парична казна од 50.000 до 300.000 денари ќе се казни правното лице ако не ги употребува грбот и знамето на Македонија во согласност со законските одредби, додека со парична казна од 20.000 до 50.000 денари може да се казни и одговорното лице на органот на државната власт, единицата на локалната самоуправа, јавната установа, јавното претпријатие и јавната служба, што ја основа Републиката, односно единицата на локалната самоуправа.