Судиите треба да се свесни дека со ваквата постапка може да се предизвика штета на државата која би произлегла преку нефункционалност на институциите што би значело дека Управата за имотно правни работи нема да ја работи експропријацијата на „Бехтел“ и „Енка“, укажаа денеска членови на Синдикатот на работниците од управата, правосудните органи и здруженијата на граѓани на РМ (УПОЗ) на нивниот протест пред Министерството за финансии (МФ). 

Претседателот на Синдикатот на УПОЗ, Трпе Деаноски исто така посочи дека со ваквата одлука ќе престане да работи Бирото за јавни набавки со што, ниту една институција во државата нема да може да набави било што и да биде потребно за вршење на нивната работа. 

- Има опасност Министерството за финансии да го затвори трезорот и ниту еден вработен во јавниот сектор да не добие плата – предупреди Деаноски.

Тие излегоа пред МФ поради времената мерка на Уставниот суд за замрзнување на зголемувањето на платите за 30 отсто на вработени во МФ и органи на државна управа кои вршат работи поврзани со Буџетот. Од УПОЗ велат дека со ваквата постапка уставните судии им наштетило на вработените во државата кои и со овие 30 се далеку од просекот за живот.

Од УПОЗ посочија дека протестираат нивни членови од Министерството за финансии, Управата за имотно-правни работи и Бирото за јавни набавки и оти ќе биде искажан револт од донесената времена мерка на Уставниот суд, со која се замрзна исплатата на надополнувањето на основната плата за 30 проценти на вработените во Министерството за финансии и вработените во другите органи на управата, кои се опфатени со автентичното толкување.

За потсетување Уставниот суд на седница на 5. месецов поведе постапка за преиспитување на уставноста на членот 66 став 3 од Законот за буџети, со кој се овозможи покачување за 30 отсто на платите на вработените во Министерството во финансии и органи на државна управа кои вршат работи поврзани со Буџетот.

Како што информираа од Уставен суд, донесена е времена мерка до конечна одлука, што значи додека Судот конечно не е произнесен.

Подносителот на иницијативите Mирослав Драганов ги оспорува автентичното толкување на членот 66 став 3 од Законот за буџети и член 66 став 3 од Законот за буџети.

Според подносителот на иницијативата не е јасно кои вработени имаат право на дополнување на основната плата од 30 отсто, кои биле работните места со соодветни специфики и посебни одговорности и врз основа на што се определуваат овие места и кој ќе ги определува. Наведено е дека со самата законска одредба се воведува основ за арбитрерно постапување на органот на државната управа при определување кој има право на пропишаниот додаток.

Во иницијативата има наводи дека вработените во Министерството за финансии кои вршат специфични работни задачи и имаат посебна одговорност се доведуваат во неосновано привилигирана положба во однос на граѓаните кои се вработени во други органи на државната управа и вршат специфични задачи и имаат посебна одговорност, со што се ставаат во нерамноправна положба. 

Според подносителот, со автентичното толкување, Собранието постапило спротивно на Уставот и на Деловникот бидејќи во постапката за давање автентично толкување на член 66 став 3 од Законот за буџети ја изменило толкуваната одредба со воведување на нови елементи и како последница на тоа била изменета и дополнета законската одредба спротивно на постапката за донесување на закони.