Еден од високите генерали на американските маринци предупредува дека евентуален конфликт меѓу САД и Кина би бил значително поразорен и поскап од актуелната војна со Иран.

Генерал-потполковник Стивен Скленка, заменик-командант за инсталации и логистика, оцени дека Кина повеќе не е „речиси рамноправен“, туку веќе целосно рамноправен противник на САД.

– Не постои поголема закана од Народна Република Кина. Не се работи за тоа дека се блиску – тие веќе ни се рамни и не парираат во речиси секој сегмент – изјави Скленка.

Тој, кој има искуство од Индо-пацифичкиот регион, предупредува дека Кина агресивно го засилува своето воено присуство и влијание, особено во спорните води со соседите.

Иако сегашниот конфликт со Иран дава одредена слика за современото војување, Скленка нагласува дека тој не може да се спореди со евентуална војна со Кина.

– Доволно е да се погледне што се случува со Иран за да се разбере колку војната е сериозна, но конфликт со Кина би бил многу поскап и покомплексен – посочи тој.

Според него, и покрај релативно малите загуби на САД во операцијата против Иран, конфликтот покажува колку и средно силни држави можат да нанесат сериозна штета на посилни противници.

Дополнително, новите форми на војување, како употребата на дронови, претставуваат сериозен предизвик. Искусството на САД од претходни војни не мора целосно да одговара на идните конфликти.

– Никој од нас денес не се соочил со вистински рамноправен противник кој истовремено нè предизвикува во сите домени – истакна Скленка.

Тој предупредува дека идните конфликти ќе бидат сеопфатни – не само на копно, туку и во дигиталниот простор, со комбинација на класични и неконвенционални средства.

Кина, според него, претставува противник од огромни размери – со најголема флота во светот по број на бродови, силна индустриска база и брз развој на вештачка интелигенција и нуклеарен арсенал.

Особена загриженост предизвикува и ранливоста на американските воени бази во Индо-Пацификот, кои во евентуален конфликт би можеле да станат директна цел.

– Нема само да се бориме од базите, туку и за нив. Тоа е нов концепт за нас и мора да се подготвиме – нагласи генералот.

Оценките доаѓаат во време на зголемени глобални тензии, при што аналитичарите предупредуваат дека секој нов конфликт меѓу големите сили би имал далекусежни последици за светската безбедност и економија.