Министерството за внатрешни работи денеска соопшти дека увидни екипи констатирале делење на летоци со пропагандна содржина против политичката партија СДСМ во колективни објекти за домување во Штип, а исти такви биле расфрлани низ улиците на Берово.

„На  26.11.2015 година во 10,00 часот во Штип,  на ул.„5та Партиска Конференција“ во влезовите од зградите по вратите и во поштенските сандачиња биле оставени летоци со пропагандна содржина против политичката партија СДСМ. Од страна на полициски службеници од ОКТУПА местото е фотографирано и земени се примероци.

На 26.11.2015 година во времето од 22.00 до 23.00 часот во Берово на улиците „Маршал Тито“, „23-ти Август“, „Димитар Влахов“, „Моша Пијаде“ и „Партизанска“, при вршење на позорно – патролна служба од страна на полициски службеници од ПС од ОН-Берово пронајдени биле расфрлани поголем број на летоци со содржина против ПП СДСМ“, гласи во денешниот билтен на МВР.