136 училишта од 51 општина на целата територија на Македонија реконструирани ќе ја започнат учебната 2013/2014 година, што ќе ги подобри условите за настава за 110.000 ученици. Министерството за образование и наука соопшти дека го продолжува Проектот за реконструкција на средни и основни училишта, со средства од државниот буџет и со заем од Банката за развој при Советот на Европа, која за целосно реновирање на десет основни училишта одобри  грант од 2 милиони евра и 1 милион евра за реновирање на шест средни училишта. Проектот опфаќа обнова на покривите на училишните згради, прозорците, санитарните јазли и подовите и инсталација на топловодно греење. - Се очекува веднаш по успешно спроведување на јавните набавки и потпишувањето на договорите со изведувачите и надзорот да се отпочне со градежните работи, а реконструираните основни и средни училишта да бидат комплетно подготвени за почетокот на новата учебна 2013/2014 година, соопшти Министерството за образование и наука.