Националниот демократски институт се заблагодари за обезбедување привремено безбедно засолниште на 174 евакуирани Авганистанци, преку резидентниот директор Роберт Скот Хејзлет.

„Го цениме придонесот од државните институции, граѓанското општество и Националната фондација за демократија да ги поддржи евакуираните во Северна Македонија и да ги подготви за нивниот нов живот“ рече Скот Хејзлет. 

На завршниот настан земаа учество министерот за надворешни работи Бујар Османи, министерот за внатрешни работи Оливер Спасовски, амбасадорката на САД, Ангела П. Агелер, претседавачот на НДИ Том Дашл, главниот програмски офицер на НДИ Стефани Раст, и претставници од државните институции, Обединетите Нации и граѓанското општество, кои беа вклучени во серија разговори кои се фокусираа на социјалната инклузија и помош при интеграција, како и правната заштита и заштитата на човековите права. 

На 5 октомври 2021 година, Северна Македонија ги пречека своите први бранители на демократијата од НДИ Авганистан, на кои им се придружија дополнителен НДИ персонал и семејствата, како и грантистите на Националната фондација за демократија (НЕД), кои се приклучија во декември 2021 година. По речиси две години, канцеларијата во Скопје му кажа збогум на последното семејство од Авганистан во јули 2023 година кога тоа тргна кон нов живот во Канада.