Во Куманово ќе се утврдат локации за бушотини за снабдување со вода за противпожарните возила, соопштија од локалната самоуправа. 

Општинскиот штаб за заштита и спасување дава предлог да се формира трочлена комисија од претставници од ТППЕ Куманово, ЈП „Водовод“ Куманово и ЈП „Чистота и зеленило“, да изврши увид и одреди потенцијални локации на територија на општина Куманово за изведба на бушотини за снабдување со вода, кои би се користеле за полнење на возила на ТППЕ за гасење на пожари и изградба на хидранти. Се препорачува на градоначалникот на Општина Куманово Максим Димитриевски да спроведе итна постапка за изведба и опремување на бушотините.

Во просториите на Општина Куманово денеска се одржа состанок на Општинскиот штаб за заштита и спасување во врска со моменталната состојба и справување со пожари на територија на општина Куманово, како и мерки и активности кои ќе бидат превземени за заштита и спасувње при евентуална појава на пожари. 

Апелираа до граѓаните да се воздржат од палење на стрништа и отпаден материјал во дворови и на отворен простор, со цел да се спречи настанување на пожари, како и да пријават сомнителни движења на лица и возила, можни причинители на пожари, на надлежните институции. Деновиве имаше пожари на територија на Општина Старо Нагоричане, но и на подрачје на Општина Куманово.