Од 20 проценти казна на плата па до отказ од работа можат да заработат сите вработени во Агенцијата за катастар на недвижности кои биле инволвирани во пропустот со градежната парцела кај Народната банка. Директоро Славче Трпевски најавува дека ќе покрене дисциплинска постапка  против сите одговорни за погрешниот податок дека парцелата понудена на продажба е во целосна сопственост на Република Македонија. „Референтот кој го работел овој предмет направил превид и го консултирал само катастарскиот план, но не и имотниот лист. Кога го издал податокот навел дека целокупната градежна парцела и сите катастарски парцели од кои е сочинета се во сопственост на Република Македонија иако во имотните листови состојбата не била таква“, рече Трпевски, кој изрази жалење за пропустот.

Според него, превидот е отстранет и веќе се издадени точни податоци до Министерството за транспорт и врски, а дигитализацијата на катастарските планови која треба да заврши до крајот на годинава е клучна за во иднина да не се случуваат вакви грешки.

Согласно Законот за државни службеници, против сите за кои ќе се утврди дека имаат одговорност за овој случај ќе биде покрената дисциплинска постапка која може да резултира со казни - од 20 проценти од плата па до отказ од работа, вели Трпевски.

Министерот за транспорт и врски Миле Јанакиески денеска ја повика Агенцијата за катастар на недвижности да преземе соодветни мерки против вработените кои ја направиле грешката, бидејќи, како што рече, „не воведе во една непријатна ситуација и мене како ресорен министер, но пред се, Комисијата за јавни наддавања“.

Продажбата на државното земјиште во Маџир маало во Општина Центар, каде што требаше да се гради хотел во барок-стил, е поништена поради пропуст во Катастарот, откако било утврдено дека дел од земјиштето кое било огласено и лицитирано е во приватна сопственост на физички лица. Сопствениците самите се јавиле во Министерството и понудиле докази дека имотот им бил вратен со денационализација.

Ова градежна парцела на тендерот минатата недела ја купи единствениот понудувач – Друштвото за трговија промет и услуги „Амадеус Стоун ДООЕЛ“ од Скопје, а продажбата предизвика реакции во јавноста поради ниската постигната цена од 71 денар за квадратен метар.