Спорните 30.000 гласачи кои беа избришани од избирачкиот список за предвремените парламентарни избори на 11 декември минатата година ќе бидат вратени во списокот затоа што така е предвидено во Изборниот законик. 

Државната изборна комисија е подготвена да ги организира локалните избори, но не можат да кажат кога тие ќе се одржат. 

Субхи Јакупи од ДИК вели дека во моментов се ажурира избирачкиот список, а датумот на изборите го одредува претседателот на Собранието. 

„Ние како ДИК, нормално, дека сме подготвени да ги организираме изборите, но тоа зависи и од самиот правен акт кој треба да го донесе претседателот на парламентот и да го одреди точниот датум, согласно Изборниот законик. Ние, согласно Изборниот законик, го ажурираме избирачкиот список” – изјави Јакупи за Алсат М. 

Процесот за формирање нова влада кој се одолговлекува и политичката криза која трае две години ги ставија во втор план локалните избори.