Вмровските градоначалници од денеска ги фаќаат фотелјите
Дарко Костовски, новиот градоначалник на Општина Бутел, денеска го доби уверението на Општинската изборна комисија и седна во градоначалничката фотелја на местото на Велимир Смилевски, кој ја предаде функцијата.
Костовски истакна дека од денес е во служба на граѓаните и дека сите заеднички ќе зачекориме кон модерна, безбедна и просперитена Општина Бутел. Истовремено уверенија им беа доделени и на новоизбраните советници каде мнозинството од десет советници го има ВМРО ДПМНЕ.
Борис Георгиевски од СДСМ денеска му ја предаде функцијата на новиот градоначалник на Гази Баба, Бобан Стефковски, кој веќе еднаш порано ја водеше оваа општина.„Во оваа прилика би сакал само да потсетам дека пред четири години општината ја наследив со повеќе од 2 милиони евра долг, без проекти и можност за блокирање на сметката. За разлика оттогаш, денеска општината ја оставам со повеќе од 3.250.000 евра приходи на сметката и без долгови“, објави Георгиевски.
Иван Јорданов, кандидатот од ВМРО-ДПМНЕ за Штип, кој победи уште во првиот круг од локалните избори, денеска официјално ќе ја преземе функцијата и ќе биде првиот од опозицијата кој ќе стане нов градоначалник.
Како што е најавено во агендата, предвидено е напладне Јорданов да го добие Уверението од страна на Општинска изборна комисија, а во 12:30 часот ќе се изврши примопредавањето на функцијата во Кабинетот на Градоначалник на Општина Штип.
„Јорданов ќе присуствува на литургија во црква Успение на Пресвета Богородица во Ново Село, а потоа ќе пешачи од Ново Село до Општина Штип со неговиот тим“, предвидено е во агендата.
По првиот круг 29 општини добија градоначалници, од кои кандидатите на ВМРО-ДПМНЕ победија во 22.
A.K.
Слично
Поврзани вести
