ВМРО-ДПМНЕ денеска на партиската конвенција во Домот на културата „Браќа Миладиновци“ во Струга че одучи кој кандидат ќе го поддржи за претседателските избори со кампањата „За честита Македонија“.

Меѓусебни конкуренти за да се преселат на вилата на Водно и да го заменат Ѓорѓе Иванов се Никита Шекутковски – професор, Ѓорѓи Манасков – претседател на Стопанска комора за енергетика, Васко Костов – фармацевт, Влатко Ѓорчев – пратеник, Гордана Силјановска – професор, Илија Димовски – професор во пензија, Филип Петровски – ексдиректор на Архив, Горан Ангелов – директор на „Дрисла“ и Сашо Кутлешовски – професор.

– Кандидатот на ВМРО-ДПМНЕ може да победи и ќе победи на претседателските избори. Но тој кандидат мора да ги отсликува сите овие работи кои што ги кажувам, односно да биде способен да допре и до членовите на ВМРО-ДПМНЕ и до симпатизерите на ВМРО-ДПМНЕ, до поддржувачите на ВМРО-ДПМНЕ, тоа се различни категории, понатаму да допре до неопределените и до незадоволните од СДСМ, а во исто време да има чисти и јасни позиции по однос на несреќната територијална организација, која што се случи во 2004 година, по однос на Законот за јазици и по однос на прашањето за името. – коментираше вчера потпретседателот на ВМРО-ДПМНЕ, Александар Николоски, во интервју за „Лидер“.за тоа каков профил треба да биде нивниот кандидат за шеф на државата.

На почетокот на конвенцијата пред делегатите и претседателските кандидати ќе се обрати претседателот на ВМРО-ДПМНЕ Христијан Мицкоски, а потоа ќе се претстават сите девет кандидати.