Идејата на екс премиерот Никола Груевски да се формира Специјализирана национална математичка гимназија во Македонија, сепак ќе ја реализира Владата на премиерот Зоран Заев која реши да го продолжи проектот и да не го прекинува.Груевски елитната гимназија за математичари ја најави лани летото. 

„Никогаш математиката сама за себе не била цел туку суштинска алатка за постигнување други цели и отворање на значителни можности. По примерот на многу земји предвидуваме отворање на специјализирана  национална математичка гимназија, која ќе нуди образование по посебни наставни планови и програми креирани и одобрени од Биро за развивање на образованието и поддршка од Природно-математичкиот факултет и МАНУ, кои ќе бидат дел од вонредниот наставен кадар и поддршка на редовниот“, истакна тогаш Груевски.

Замислата беше гимназијата за најдобрите математичари да биде отворена годинава заедно со соодветен кампус за учениците, како и можност за дисперзирани студии во други градови.

За таа цел и екс министерот за образование Спиро Ристоски беше во посета на елитната математичка гимназија во Белград, засилено се работеше на проектот, но потоа се засили политичката криза, следеа избори и сосема различна разрешница на настаните со смена на власта. Секако, добар потег е и на СДСМ тоа што било добра идеја и издржан проект од претходната власт да го продолжи или пак сега да го реализира, а не да го прекине само затоа што дошло од устата на за нив политичкиот непријател Груевски. 

За да бидеме попрецизни засега со одлука на влада само е разгледана информацијата за основање на Специјализирана национална математичка гимназија во Скопје, и за тоа е задолжено Министерството за образование и наука да подготви анализа и да достави предлог со активности за основање на истата.