Владата објави јавен оглас за именување директор на Државниот инспекторат за локална самоуправа, орган во состав на Министерството за локална самоуправа. Избраниот кандидат ќе раководи со институцијата во мандат од четири години.
За директор може да биде именувано лице кое е државјанин на Македонија, против кое не е изречена правосилна казна затвор или забрана за вршење професија, дејност или должност и кое има завршено високо образование со најмалку 240 ЕКТС кредити или VII/1 степен. Дополнително, кандидатите треба да имаат најмалку шест години работно искуство по дипломирањето во соодветната област.
Еден од условите е и активно познавање на странски јазик, односно кандидатите треба да поседуваат меѓународно признат сертификат за познавање на англиски јазик или на еден од трите најчесто користени јазици во Европската Унија – англиски, француски или германски – најмалку на ниво Б2. Како валидни се прифаќаат сертификати како ТОЕФЕЛ со најмалку 74 бода, ИЕЛТС со најмалку 6 бода, Cambridge English: Legal или Cambridge English: First, БУЛАТС со најмалку 60 бода или АПТИС со ниво Б2. Кандидатите треба да имаат и потврда за активно познавање на компјутерски програми за канцелариско работење.
Со пријавата кандидатите треба да достават кратка биографија, мотивациско писмо, план и програма за идна работа, уверение за државјанство, доказ дека не им е изречена забрана за вршење професија, диплома за завршено образование, доказ за работно искуство и сертификат за познавање странски јазик, како и потврда за работа со компјутер. Документите треба да бидат доставени во оригинал или во копија заверена кај нотар.
Пријавите со потребната документација се доставуваат до архивата на Владата или по пошта на адреса булевар „Илинден“ бр.2 во Скопје, со назнака дека се однесуваат на огласот за именување директор на Државниот инспекторат за локална самоуправа. Рокот за пријавување е 15 дена од денот на објавувањето на огласот во дневниот печат, а некомплетната или ненавремено доставена документација нема да биде разгледувана.
Платата за оваа функција се пресметува врз основа на коефициент утврден со одлука за платите на функционерите кои ги именува Владата, објавена во „Службен весник на Република Северна Македонија“.
