На Директорот на Државниот пазарен инспекторат Стојко Пауновски три пати писмено му било испратено известување дека не постапил во случајот со преземањето на рамковно вработените од Министерството за политички систем и за односи меѓу заедниците, објави попладневно на твитер Владата преку профилот на портпаролот. 

„Пауновски е детално информиран за неговото непостапување – ДПИ доби дописи на 5, 10 и 21 април од министерствата за политички систем и информатичко општество и администрација. Имаше и повеќе усни укажувања.“, пишува на Твитер профилот на портпаролот на Владата.

Од таму додадоа и дека во меѓувреме Пауновски не побарал средба, не разговарал и не предложил начин на решавање на евентуалните предизвици.

Ова соопштение од Владата следи по изјавата на Пауновски за Алсат, дека не добил никакво укажување од Владата за неговото однесување.