Партијата на Македонците во Грција, „Виножито“ бара воведување на македонскиот јазик во државните училишта во земјата. 

Главните барања на партијата на Македонците во Грција за признавање на македонското малцинство и на македонскиот јазик, за воведување на нивниот мајчин јазик во образовниот грчки систем и натаму остануваат главните цели. Виножито до грчките власти ќе испрати и петиција за признавање на македонскиот јазик и воведување во државните училишта.

На третиот конгрес на „Виножито“, што вчера се одржа во Горно Врбени, Леринско, е одлучено партијата да учествува на наредните избори за европскиот Парламент во Грција, доколку за тоа успеат да соберат доволно пари.

На конгресот во Централниот комитет беа избрани и седум нови членови, што во партијата се толкува како голем успех затоа што сѐ повеќе млади Македонци почнуваат да се интересираат за активностите на партијата.