Пратениците од Собранието на Република Македонија ќе имаат работен викенд во кој мора да се заврши расправата по предложениот ребаланс на Буџетот која стартува денеска во 11 часот со продолжение на 11. седница на чиј дневен ред е ребалансот на буџетот.

Изминативе три дена пратениците од владејачкото мнозинство тврдеа дека со ребалансот се кратат непродуктивните трошења, а се консолидираат проекциите од владината програма за живот во Македонија.

Опозицијата, пак, обвинуваше дека се намалени парите за образованието, здравството, полицијата и армијата, а се кратат и капиталните инвестиции.

Владата со ребалансот сака да скрати 122 милиони денари од предвидените пари за патни трошоци, како и 257 милиони денари за репрезентации, реклами и економски промоции.

Од друга страна, обезбедени се средства за зголемување на минималната плата на 12 илјади денари, средства за стечајците, како и за поддршка на туризмот, малите и средни претпријатија итн.