Вицепремиерката Радмила Шекеринска на својот профил на Фејсбук тврди дека грчкиот воен оркестар ја изведувал македонската химна заедно со останатите по повод синоќешната свеченост за одбележивање на 70-годишнината од формирањето на НАТО.

„Воените оркестри на Армиите на Северна Македонија, Грција, САД, Велика Британија и Словенија ги интонираа заедно химните на Северна Македонија и на НАТО.Заедно сме посилни“, напиша министерката за одбрана.

Ваквата реакција на Шекеринска следува по реакциите кои не стивнуваат од вторникот кога во Скопје официјално беше дочекан грчкиот премиер Алексис Ципрас и грчката владина делегација, но без интонирање на македонската химна.

Тоа беше објаснето со заштедување на време во протоколот по доцнењето на владиниот авион на Грција.

Во вторникот на изборната конвенција и кандидатот за претседател на владината коалиција Стево Пендаровски ги повика присутните во СРЦ „Борис Трајковски“ заедно да ја испеат химната.