ВИДЕО: Мечка си шета во центарот на Битола: Битолчани го повикуваат Ангелов во акција
Изминатите два дена, жителите на Битола забележале мечка како се движи низ градот, а снимките брзо се проширија на социјалните мрежи. Животното било снимено на улицата „Македонска Фаланга“, во близина на градското шеталиште, под Тумбе Кафе, кај стадионот во Битола и на улицата 16 кај Водовод.
Граѓаните изразуваат загриженост и повикуваат надлежните институции да преземат мерки за да се избегнат несакани инциденти, а во дел од објавите се повикува и директорот на ДЗС, Стојанче Ангелов.
Од СВР Битола потврдија дека случајот е официјално пријавен во полиција. Ловните здруженија, пак, истакнуваат дека мечката е под трајна заштита и немаат законска можност за интервенција против животното.
Градоначалникот на Битола, Тони Коњановски вели дека деновиве има повеќе пројави за мечка.
„Како градоначалник на Битола и во име на Општина Битола Ве информирам дека во врска со случајот на појава на мечка што можеше да се види на видео споделено на социјалните мрежи, контактирав и ги информирав Центарот за управување со кризи, Министерството за внатрешни работи, како и државниот инспекторат за шумарство и ловство при Министерството за земјоделие, шумарство и водостопанство и Агенцијата за храна и ветеринарство.
Деновиве има повеќе пријави до институциите за мечка во атарот на селата Трн, Оптичари, Поешево и Егри, а последната пријава на бројот 112 во Центарот за управување со кризи е од денешните рани утрински часови за мечка видена во околината на градскиот парк во Битола.
Од страна на институциите бев известен дека во тек се со актуелната состојба.
Изминатите години во овој регион исто така имало пријави и случаи каде биле нанесувани материјални штети од мечки кои согласно законите се под трајна заштита“, истакна тој.
Слично
Поврзани вести
