Советникот за национална безбедност на премиерот, Зоран Верушевски, по неуспешниот обид на судот да го пронајде на работното место, денеска се појави на судското рочиште за случајот „Таргет и Тврдина“ на СЈО за да сведочи за масовното прислушкување. 

Судот на претходното рочиште му достави покана на поранешниот разузнавач на неговото работно место, но тој не се одзва на 6 септември и ја пропушти можноста да се соочи со првообвинетиот Сашо Мијалков како поранешен директор на УБК.

На рочиштето е и обвинителот од СЈО, Артан Ајро, кој е овластен застапник на предметот од страна на Јавното обвинителство. Покрај Мијалков, во овој случај обвинети се и поранешниот началник на Петтата управа во МВР Горан Грујевски и вработениот во УБК Никола Бошкоски, поранешната министерка за внатрешни работи Гордана Јанкулоска, шефот на кабинетот на Мијалков, Тони Јакимовски, Владимир Варелов од УБК и уште пет други лица од Управата.

Верушевски треба да сведочи како му ги предал прислушкуваните разговори на тогашниот опозициски лидер Зоран Заев добиени од „свиркачите“ Звонко Костовски и Ѓорѓи Лазаревски.