Започна судењето во случајот „Адитив“, кој се однесува на сомневања за злоупотреба на јавни набавки и перење пари во врска со купувањето адитиви за јаглен за потребите на ЕСМ – Филијали ТЕЦ Битола и ТЕЦ Осломеј.

Осомничените лица организирале и извршиле пререгистрација на правни субјекти за да ги изиграат постапките за јавна набавка, со што овозможиле одредени компании да добијат договори и да се стекнат со значителна имотна корист.

Обвинетите се 31 физичко лице и пет правни лица, меѓу кои и високи функционери од енергетскиот сектор. Првообвинетиот, Васко Ковачевски, инаку поранешен генерален директор на ЕСМ; судијата го оцени како недостапен.

Неговата адвокатка Андријана Димитрова побара да се одложи денешното рочиште затоа што ќерката на Ковачевски ја ангажирала вчера, но на предлог на Обвинителството и со решение на судот ќе му се суди во отсуство бидејќи не е достапен на органите за прогонот.

Судењето се одвива во дигиталната сала на затворот Идризово која за прв пат се користи по три години пауза.