Бесплатната вакцинација против сезонски грип, наменета за ранливите категории граѓани се одвива непречено на сите 6 пункта во Здравствен Дом Скопје, како и во здравствените домови во 30-тина градовови низ Македонија и во општите болници во Гевгелија, Дебар и Кавадарци.

-Според утврдениот протокол за системско менаџирање, на термините за вакцинација, секој петок од тековната недела се отвараат термини преку системот Мој термин. Оваа пракса годинава е воведена бидејќи се наоѓаме во период на вонредна здравствена состојба каде физичка и временска дистанца помеѓу пациентите се клучен фактор за зачувување на здравјето на луѓето во овој момент. Од таа причина системското менаџирање на вакцинација е клучен фактор, соопштуваат од Министерството за здравство.

Оттаму информираат и дека вакцини има за сите, но истовремено апелираат до граѓаните кои закажале термин за вакцинирање да се појават на пункт за вакцинација, а доколку се спречени, резервираниот термин да го откажат.

Инаку, што се однесува до вакцината против сезонски грип која сакаат да ја примат и оние граѓани кои не спаѓаат во ниту една од ранливите групи, таа се аплицира во Центарот за јавно здравје-Скопје, а цената е 800 денари. Сепак, првите 2000 дози беа потрошени само за неколку часа уште на првиот ден од вакцинацијата, и како што велат за Фактор од ЦЈЗ-Скопје, се очекува новите дози да пристигнат за 10-тина дена.