Комисијата за спречување на корупција утре на седница ќе ги разгледа приговорите поднесени од генералниот секретар на ВМРО-ДПМНЕ, Игор Јанушев, за наводни предизборни нерегуларности од страна на Агенција за финансиска поддршка во земјоделството и руралниот развој - Скопје и градоначалниците на Гази баба, Штип и Ново Село.

Според ВМРО-ДПМНЕ, во изборен период,  на 4-ти април, при започната изборна кампања, платежната агенција, односно агенцијата за финансиска поддршка на земјоделството соопштила дека  се исплатени 77 милиони денари – или над 1 милион и 250 илјади евра на над 2.000 лозари.

Поднесен е приговор дека општина Гази Баба објавила дека од 15-ти април започнува физичко обезбедување во училиштата на трошок на општината Гази Баба. ВД градоначалникот на Ново Село дал согласност за вработувања на 10 работници, што според опозицијата е законски недозволиво. Од таму наведоа и дека општина Штип ги ангажирала пожарникарите да делат дрва на социјално загрозените лица од градот, а биле злоупотребени и „Македонија Пат“ и „Македонски Шуми“.