Германски турист доби судски спор против туристичка агенција откако за време на летувањето во Грција не можел да најде слободни лежалки на плажа.

Станува збор за семеен одмор на островот Кос во август 2024 година, за кој платил 7.186 евра. Туристот бил незадоволен бидејќи лежалките секое утро биле зафатени уште пред појадок, иако хотелските правила забранувале оставање пешкири преку ноќ.

Тој во тужбата навел дека на плажа доаѓал уште во 6 часот наутро, но и тогаш сите лежалки биле веќе резервирани. Поради тоа, семејството секојдневно губело околу 20 минути во потрага по место, а децата често биле приморани да лежат на пешкири на земја. Дополнително, посочил дека персоналот не реагирал на нивните поплаки.

Случајот завршил пред суд во Хановер, кој пресудил во корист на туристот. Судот оцени дека пакет-аранжманот бил со недостатоци, бидејќи не ја обезбедил услугата што гостот разумно можел да ја очекува.

Иако туристичката агенција не управувала директно со хотелот, судот утврдил дека таа има делумна одговорност – бидејќи требало да обезбеди организација што овозможува соодветен однос меѓу бројот на лежалки и гостите.

Со пресудата, туристот доби поврат од 986,70 евра.