Триглав ИНТ холдиншка дружба од Словенија сака да продолжи со преземањето на акции од компанијата Триглав Осигурување АД Скопје, па за таа цел е доставена и јавна понуда за преземање на 16.020 обични акции со право на глас.

Триглав ИНТ веќе поседува 44.164 обични акции кои претставуваат 73,88% од вкупниот број на издадени акции со право на глас. Во понудата стои дека цената за преземање на акциите на Триглав Осигурување АД Скопје ќе изнесува 14.640 денари по акција што е за шест пати повеќе од просечната цена на Македонска берза постигната во последната година пред известувањето за намерата за преземање.

Преземачот Триглав ИНТ на свој „товар“ ќе ги носи и трошоците за прифаќање на понудата за преземање на акции, односно трошоците кои ги наплаќа Централниот депозитар за хартии од вредност. 

Исто така Триглав ИНТ депонираше и банкарска гаранција во ЦДХВ во износ кој е доволен да се надоместат сите иматели од кои треба да бидат преземени акциите, а ќе се чека и на формални одлуки на Комисијата за хартии од вредност и Агенцијата за супервизија на осигурувањето за што ќе се почитуваат сите законски одредби.