Тошковски: Од денеска демонтирање на дивиот забавен парк кај Борис Трајковски
Техничкиот министер за внатрешни работи Панче Тошковски информира дека започнува демонтирање на дивиот забавен парк кој изминатите денови беше поставен на просторот кај спортско-рекреативниот центар „Борис Трајковски“ во Карпош.
Пред неколку дена од Град Скопје известија дека станува збор за парк на „Дизниленд Реквизити“,фирма од Чаир која била регистрирана пред еден месец. Од Град Скопје известија дека е издаден казнен налог, но дека за отстранувањето на објектите е во надлежност на другите институции.
„Постапувајќи по допрен глас дека во Скопје, на подрачјето на Општина Карпош, поточно пред спортскиот центар Борис Трајковски без соодветни документи и потребни дозволи се поставени реквизити за забавен парк меѓу кои и панорамско тркало, на 20.05.2024г. Единицата за економски и компјутерски криминал при СВР Скопје во координација со службени лица од Државниот пазарен инспекторат, Управата за јавни приходи и градежен инспектор од Општина Карпош излезе на лице место и презема конкретни соодветни мерки и активности од делокругот на својата надлежност и овластувања.
Имено, од страна на инспекциските служби по преземените мерки и активности и констатираната фактичка состојба изготвени се Записници за констатирана состојба додека од страна на овластен градежен инспектор од Општина Карпош поведена е постапка за констатираните неправилности, по што ке бидат преземени конкретни мерки во насока на отстранување на истите, престанување со вршење на активноста, како и дислоцирање на реквизитите“, соопшти Тошковски.
Слично
Поврзани вести
