Тринаесет годишно дете се здобило со тешки повреди на раката од петарда и ќе има траен инвалидитет, објавија од Клиничкиот центар „Мајка Тереза“ по новогодишната ноќ.

- Имаме двајца пациенти од физички напад, едниот е задржан на опсервација и во текот на денов ќе биде пуштен дома, како и 13.годишно дете со тешка повреда на раката од петарда, кое веќе е оперирано на Детската клиника за хирургија и најверојатно ќе биде со инвалидитет на раката, информираше претпладнево Игор Мерџановски, доктор од ТОАРИЛУЦ.

Со акутно труење од алкохол на Клиниката за токсикологија во Скопје биле примени 18 пациенти, а најмладиот има 14 години.

- Вообичаено како секоја година имаме помалку пациенти од минатата година, изјави Андон Чибишев, директор на Клиниката за токсикологија во Скопје. 

Генералната оценка на здравствените институции во Скопје е дека ноќта поминала прилично мирно со помал обем на работа. 

Еден од  пациентите измешал алкохол и таблети.  Акутното труење е индивидуално и, како што појасни Чибишев, може да се случи и со две чаши алкохол.   

- Труењата со алкохол до 25 години се животозагрозувачи состојби и треба  многу да се внимава, тоа е едниот проблем, а другиот е што има пациенти што тоа го зачинуват со медикаменти што  е уште поопасна состојба која може да предизвика сериозни нарушувања на здравјето, додаде Чибишев.