Исчезнатиот стружанец, за кого од почетокот на неделава неговиот брат ја алармираше полицијата дека му се губи трагата откако заминал да собира печурки, е пронајден мртов во атарот на струшкото село Глобочица денеска околу пладне.

Како што информира, портпаролот на СВР Охрид, Стефан Димоски, телото на 60-годишниот К.М. не покажувало траги на насилство, а смртта била констатирана од медицинска екипа.

Полициска екипа, во присуство на јавен обвинител, извршила увид на местото на настанот, а телото на починатиот е предадено на обдукција.

Лицето беше пријавено за исчезнато во понеделникот доцна попладне во реонот на селото Брчево, каде што собирал шумски плодови и не се вратило во својата викенд куќа, а не била воспоставена ниту телефонска комуникација.

По него трагала екипа на полицијата, Планинската спасителна служба (ПСС) при Црвениот крст Охрид и локалното население.