Кога единствениот критериум при вработување е партиската припадност, кога партијата се поистоветува со државата и кога клeптократијата се покрива со национализам, тогаш изливите  на агресија кои секојдневно ги има и во училиштата  се очекувани- вели за Фактор, поранешниот министер за образование и наука Сулејман Рушити.  

По последниот  физички напад  од страна на наставник врз ученик во основно училиште во скопско Драчево, до закани и притисоци врз ученици во неколку гимназии, па се  до јавна поддршка  на крвавите насилства во Собранието  јасно е вели дека состојбата е до точка на вриење, а некој свесно сака да предизвика меѓуетнички тензии за личен интерес и спас. Процедурата за нивно санкционирање и превенција  за да не се случат во иднина, потенцира Рушити се знае- почитување на законските прописи и правила. 

“За правда ќе  чекаме нова Влада која има задача да донесе правда. Состојбата не е за потценување. Инциденти се можни. Родителите треба да бидат посебно внимателни. А,  со формирање на новата Влада и независното судство треба од образованието да се тргнат вакви наставници. Има доволни аргументи за тоа”- потенцира Рушити. 

Очигледо според него е   дека иницијаторите на насилствата се трудат да провоцираат конфликт, дури и се надеваат на меѓуетнички конфликт. 

“Опрезноста е мајка на мудроста, рекол Цицерон.  Се работи за мафијашко здружување и треба да сме трезвени. Во образовниот процес ќе треба доста да се работи, да се вложи многу труд, енергија  за да се стават нештата во нормала. Тоа е една од областите каде најмногу се чувствуваат партиските влијаниja  и воопшто каде најмногу  влијаело здружувањето”- додава екс министерот за образование. 

Последните случувања како што вели јасно покажуваат дека граѓаните намерно се втурнуваат во сценарија за  потенцијални меѓуетнички несогласувања и немири во обид власта да избегне одговорност за лошите политики. 

“Тоа им е единствената карта за спас. Односно надеж. Посакуваат конфликт, да си прогласат вонредна состојба за после да се справат со неистомислениците”- нагласува Рушити. 

Зaконската регулатива како што вели го третира ова прашање,  но се додека истото не биде процесуирано во судскиот систем и додека не профункционираат институциите,  не може да се очекуваат брзи и видливи резултати за одговорност и отчетност. 

“Сметам дека клучот е во независното судство. Само правдата е напредок”- порачува поранешниот министер за образование и наука.  

Во последниот инцидент во основното училиште „Кузман Шапкарев” родител тврдеше дека наставник го удрил неговото дете бидејќи рекло дека е на страната на пратениците кои беа нападнати  во Собранието. За случајот  беа известени полицијата, просветниот инспекторат и училиштето кое најостро ги демантираше обвинувањата. За јавно изразената поддршка на насилствата во Законодавниот дом од страна на професорка во гимназијата “Раде Јовчевски –Корчагин”  група наставници и родители покренаа петиција за санкционирање. На социјалните мрежи се погласно се зборува за нови случаи во кои професори и директори на училишта вршат притисоци врз учениците и ги убедуваат да излезат на протести. До редакцијата стигна реакција на група родители чии деца учат во неготинската гимназија и кои тврдат дека професорка во училиштето која има клас на матуранти, со погрдни зборови и притисоци им се заканувала и ги навредувала учениците зошто не се активни на протестите против ткн. Тиранска платформа. Најавија дека ќе го информираат  родителскиот одбор, раководството на училиштето па и општината, а потоа и јавно ќе го објават името на професорката.