Судија на претходна постапка при Основниот кривичен суд Скопје, постапувајќи по предлог на Основното јавно обвинителство за гонење организиран криминал и корупција, донесе решение со кое му определи мерки за обезбедување присуство и мерки за претпазливост на апелациониот судија Ѓоко Ристов, кој е осомничен за тешки кривични дела од областа на финансискиот криминал.

Судот го прифати предлогот на обвинителството и на Ристов му определи мерка куќен притвор, како и дополнителна мерка за обезбедување присуство, односно одземање на пасошот и забрана за издавање нов.

Имајќи предвид дека осомничениот е апелационен судија и дека се товари за две кривични дела – „Перење пари и други приноси од казниво дело“ по член 273 став 1 и „Противправно стекнување и прикривање имот“ по член 359-а став 3 во врска со став 1 од Кривичниот законик, судот пред донесување на одлуката го доставил предлогот на обвинителството до надлежниот Судски совет на Република Северна Македонија, кој одлучуваше по прашањето за судискиот имунитет.

Против донесеното решение странките имаат право на жалба пред Кривичниот совет.