Индиската компанија „Сахара Индија Паривар“ ќе го реализира во Македонија проектот наречен „Сахарајан Македонија“ . Предлогот завчера бил доставен до Премиерот Никола Груевски и вицепремиерот Зоран Ставрески.

„Ни претставува голема привилегија што по неколкумесечни подготовки ја составивме визијата на нашиот претседател Субрата Рој за локација од светска класа во градот Охрид и ќе ја претставиме на премиерот на Република Македонија и министрите од неговата Влада“, стои во писмената изјава од компанијата.

Индијците соопштуваат дека „Сахарајан Македонија“  ќе се гради на 240 хектари во околината на Охридското Езеро и ќе содржи хотели од светска класа, казина, станбени и рекреативни објекти и терен за голф по меѓународни стандарди. Проектот за комплексот го има изработено една од најсилните светски компании, британската „Аткинс“, а како што се наведува во соопштението, притоа биле испочитувани сите еколошки стандарди.