Минатиот месец во Македонија имаше поларен студ. 

На 8 јануари во Берово се измерени – 28 степени.

Според метеоролозите месецот беше екстремно студен, со измерени најниските средномесечни температури досега. 

Во целата земја средните јануарски температури се под нула и се движеле од -6,8 во Маврово до нула во Гевгелија. Секаде средната температура е под просекот со многугодишните просечни вредности и до пет степени. Се движела од  -5.9 во Берово, -5,4 во Лазарополе, -4,2 во Битола и Крива Паланка, -4 степени во Скопје, -3,6 во Прилеп, -3,5  во Струмица, -3,3 во Штип, -2,7 во Демир Капија и -1 степен во Охрид.

На некои места температурата е пониска и за шест степени. Забележани се екстремно ниски температури на почетокот на месецот, а  апсолутно минимални температури се регистрирани на 8 јануари од -28 степени во Берово, -24,6 во Битола, -23,8 во Маврово, -23,3 во Крива Паланка, -23 во Лазарополе, -21  во Прилеп и – 20,6 во Штип.

Од УХМР додаваат дека во јануари се регистрирани и обилни врнежи од снег, кои започнаа на 6 јануари, а снежната покривка во најголемиот дел од Македонија се задржа до крајот на месецот, но не ги надмина досегашните максимални вредности. 

Максималната висина на снежната покривка е забележана на 19 јануари и изнесувала 85 сантиметри во Маврово, 49 во Битола, 33 во Берово, 30 во Демир Капија, 22 во Скопје, 18 во Струмица, 17 во Штип и 14 сантиметри во Прилеп. Количеството на врнежите во целата земја е во рамките на просечните вредности за јануари, освен во Демир Капија  каде врнежите се двапати повисоки од вообичаените јануарски вредности.

Претходно се најавуваше дека ќе ја имаме една од најстудените зими и тоа и се случи. 

Студот однесе три жртви во Македонија, а премрзнати имаше и на Балканот и во Европа.