Страшно невреме во Скопје – најкритично во Стајковци
Обилни врнежи од дожд и силно невреме синоќа го зафатија Скопје, при што најкритично беше во Стајковци.
Таму ноќеска беа испратени припадници на војската и на специјалните единици.
Специјалните единици, претходно успеале да се пробијат до возилата што беа заглавени на скопската обиколница. Повеќе од 30 возила беа заглавени приближно час и половина, поради свлечиште кое формирало насип, а водата влегувала и во возилата. Заглавените граѓани побараа помош преку социјалните мрежи.
Во населбата Ченто синоќа на лице место излезе и градоначалникот на Скопје, Коце Трајановски кој изјави дека во тој дел е најкритично бидејќи од Скопска Црна Гора преку Булачани дошла огромна количина на вода и целата избила во Стајковци и Синѓелиќ, а потоа оди кон Економија и Инџиково.
„Тука се и од војската и полицијата, противпожарната единица, приватните компании се вклучија со нивна механизација, правиме се што се може. Целта ни е да се пробие обиколницата, бидејќи таму има одрони, многу возила и донесена е механизација да се расчисти патот“ - кажа Трајановски.
Мобилизирани беа екипи на јавните претпријатија на градот Скопје, противпожарната единица, Водовод и канализација, комунална хигиена, водовод и патишта, МВР и други.
Слично
Поврзани вести
