Полицијата во центарот на Скопје, на локацијата кај поранешно Беко, односно ТЦЦ „Плаза“ денеска отстрани градежни работници, заради тоа што немале дозвола да работат на хотелскиот објект, чиј сопственик е бизнисменот и поранешен министер Борис Стојменов. Тој денеска присуствувал на местото и се скарал со полицијата, па во изјава за ТВ 21, обвини дека Општина Центар му бара еден милон евра мито за да продолжи да гради.

-Четири години со платени комуналии, платено се, не може да градиме затоа што бараат милион евра мито. Не им давам мито, потенцира Стојменов.

Веднаш потоа се огласи и градоначалникот на Центар, Саша Богдановиќ, нагласувајќи дека општината најостро и категорично ги демантира тврдењата на Стојменов.

-Доколку некој му побарал мито на господинот Стојменов и има докази за тоа, наместо медиумски, Општина Центар го охрабрува случајот да го пријави во Основното јавно обвинителство, кое е надлежно да постапува за предмети од таа проблематика. Од Борис Стојменов бараме јавно извинување за изнесените тенденциозни тврдења за општината и градоначалникот Богдановиќ, во спротивно на истиот ќе му бидат поднесени соодветни пријави, вели градоначалникот Богдановиќ во демантот.